Unit-4

31-40 श्लोकाः

उद्देश्यानि।(Learning Outcomes)

प्राग्व्यपेक्षाः (Prerequisites)

मुख्यपदानि (Key terms) 

सक्ताङ्गुलि:, नखप्रभाभिः, मन्त्रौषधिभिः, पादपोन्मूलनशक्ति:, कुम्भोदरः, देवदारुवृक्षस्य त्वक्।

Discussion 

३१. दिलीपस्य दक्षिणकर: चित्रार्पितारम्भ इव अवतस्थे।
                                                         वामेतरस्तस्य कर: प्रहर्तु-
                                                         र्नखप्रभाभूषितकङ्कपत्रे।
                                                         सक्ताङ्गुलि: सायकपुङ्ख एव
                                                         चित्रार्पितारम्भ इवावतस्थे।।३१।।
पदच्छेद: – वामेतरस्तस्य – वामेतर: + तस्य।
सायकपुङ्ख एव -सायकपुङ्खः +एव
इवावतस्थे – इव +अवतस्थे।

अन्वय:                             अन्वयार्थ:
प्रहर्तु: तस्य                   – प्रहर्तुमिच्छो: दिलीपस्य
वामेतर: कर:                – दक्षिण: कर:
नखप्रभाभूषितकङ्कपत्रे     – नखकान्त्या प्रशोभितकङ्कपत्रे
सायकपुङ्खे एव            – बाणमूले एव
सक्ताङ्गुलि: (सन्)        – संलग्नाङ्गुलि: भूत्वा
चित्रार्पितारम्भ इव           – चित्रे आलिखितःइव
अवतस्थे                       – स्थितिं चकार।
सार: – सिंहं प्रहर्तुमिच्छन् राजा बाणम् उद्धर्तुं करं तूणीरे न्यस्तवान्। तदा तस्य नखकान्त्या प्रशोभितकङ्कपत्रे
बाणमूले सक्ताङ्गुलि: सन् चित्रार्पितारम्भ इव अवर्तत।
विग्रह: – सक्ताङ्गुलि: – सक्ता अङ्गुलि: यस्य स:।
चित्रार्पितारम्भ: – चित्रे अर्पित: आरम्भ: यस्य सः।
अलङ्कार: – उत्प्रेक्षा।
क्रिया – अवतस्थे – अव उपसर्गपूर्वक (ष्ठा गतिनिवृत्तौ) स्था धातो: लिट्-प्र-पु-ए-व।
अवतस्थे – अवतस्थाते – अवतस्थिरे।
अव इत्युपसर्गपूर्वक ष्ठा (स्था) धातो: ‘समवप्रविभ्य: स्थ:’इति सूत्रेण आत्मनेपदं लभते।

३२. बाहुस्तम्भेन राजा नष्टवीर्य: बभूव।
                                           बाहुप्रतिष्टम्भविवृद्धमन्यु:
                                           अभ्यर्णमागस्कृतमस्पृशद्भि:।
                                           राजा स्वतेजोभिरदह्यतान्त:
                                           भोगीव मन्त्रौषधिरुद्धवीर्य:।।३२।।
पदच्छेद: – अभ्यर्णमागस्कृतमस्पृशद्भि: – अभ्यर्णम् + आगस्कृतम् + अस्पृशद्भि:।
भोगीव – भोगी + इव।
अन्वय:                                  अन्वयार्थ:
बाहुप्रतिष्टम्भविवृद्धमन्यु:            – बाह्वोे: स्तम्भनेन प्रवृद्धरोेष:
मन्त्रौषधिरुद्धवीर्य: भोगी इव      – मन्त्रौषधिभ्यां प्रतिबद्धशक्ति: सर्प: इव
अभ्यर्णम्                               – समीपम्
आगस्कृतं                              – अपराधकारिणं
स्वतेजोभि:                             – स्वप्रभाभि:
अन्त: अदह्यत                        – स्वान्त: एव अतप्यत।
(बाहुस्तम्भेन राजा नष्टतेजोभिरन्तरदह्यत इति आशय:)
सार: – भुजस्तम्भनेन प्रवृद्धकोप: दिलीप: समीपस्थम् अपराधिनं स्वप्रभावेन स्पृष्टुमपि न शशाक इति चिन्तया मनसि महान् खेद: अजायत। मन्त्रौषधिभि: विनष्टवीर्य: सर्प इव।
अलङ्कार: – उपमा।
विग्रह: – रुद्धवीर्य: – रुद्ध: वीर्य: यस्य स:।
विवृद्धमन्यु: – विवृद्ध: मन्यु: यस्य स:।
क्रिया – अदह्यत – दह् भस्मीकरणे धातो: आत्मनेपदी कर्मणि लङ्-प्र-पु-ए-व।
अदह्यत – अदह्येतां – अदह्यन्त।

३३. सिंह: राजानं मनुष्यवाचा उवाच।
                                              तमार्यगृह्यं निगृहीतधेनु-
                                              र्मनुष्यवाचा मनुवंशकेतुम्।
                                              विस्माययन्विस्मितमात्मवृत्तौ
                                              सिंहोरुसत्वं निजगाद सिंह:।।३३।।
पदच्छेद: – तमार्यगृह्यम् – तम् +आर्यगृह्यम्।
विस्मितमात्मवृत्तौ – विस्मितम् + आत्मवृत्तौ।
अन्वय:                         अन्वयार्थ:
निगृहीतधेनु: सिंह:         – धेनुं बलात्कारेण गृहीत: सिंह:
आर्यगृह्यं                     – सज्जनश्रेष्ठं
मनुवंशकेतुं                 – रघुकुलचूडामणिं
सिंहोरुसत्वं                  – मृगराज इव पराक्रमशालिनं
आत्मवृत्तौ विस्मितं         – बाहुस्तम्भेन विस्मयाकुलं
तं                              – दिलीपराजं
विस्माययन्                  – आश्चर्यं जनयन्
निजगाद                     – उवाच।
सार: – उन्नतकुलजातंं मनुष्यकुलतिलकं सिंहोरुसत्त्वं बाहुस्तम्भनात् आश्चर्यान्वितं दिलीपराजम् इतोऽपि आश्चर्यं
प्रापयन् सिंह: मनुष्यवाचा अभाषत।
विग्रह: – मनुष्यवाचा – मनुष्यस्य वाक् मनुष्यवाक्, तया मनुष्यवाचा।
क्रिया – निजगाद – नि उपसर्गपूर्वक गद व्यक्तायां वाचि धातो: परस्मैैपदी लिट्-प्र-पु-ए-व।
निजगाद – निजगददु: – निजगदु:।

३४. दिलीपस्य अस्त्रप्रयोग: फलरहित: सञ्जात:।
                                                        अलं महीपाल तव श्रमेण
                                                        प्रयुक्तमप्यस्त्रमितो वृथा स्यात्।
                                                        न पादपोन्मूलनशक्तिरंह:
                                                        शिलोच्चये मूच्र्छति मारुतस्य।।३४।।
पदच्छेद: -अप्यस्त्रमित:- अपि + अस्त्रम् + इत:।
अन्वय:              अन्वयार्थ:
महीपाल               – पृथ्वीनाथ
तव श्रमेण अलं        – तव श्रमेण नास्ति प्रयोजनं  (साध्याभावात् श्रम: न कर्तव्य: इत्यर्थ:)
इत: मयि                 – अस्मिन् मयि
प्रयुक्तम् अपि अस्त्रं    – क्षिप्तम् आयुधम्
वृथा स्यात्                  – व्यर्थं भविष्यति
पादपोन्मूलनशक्ति:      – वृक्षोन्मूलनशक्ति:
मारुतस्य रंह:               – पवनस्य वेग:
शिलोच्चये                   – पर्वते
न मूच्र्छति                  – न प्रसरति।
सार: – हे राजन्, बाणप्रयोगेण अलम्। वृक्षोत्पाटनसमर्थ: वायु: शिलोच्चये असमर्थ:। बाणप्रयोगस्य निष्फलत्वं
भवत: शक्तिराहित्येन न, किन्तु मम प्रभाव: एव इति सिंह: राजानं वदति इति फलितोऽर्थ:।
विग्रह: – महीपाल: – मह्या: पाल:।
पादप: – पादै: पिबति इति पादप:।
अलङ्कार: – दृष्टान्त:। (चेद् बिम्बप्रतिबिम्बत्वं दृष्टान्तस्तदलङ्कृति:)
क्रिया – मूच्र्छति – मूच्र्छ मोहने धातो: पर-लट्-प्र-पु-ए-व।
मूच्र्छति – मूच्र्छत: – मूच्र्छन्ति।

३५. अहं अष्टमूर्तेः महादेवस्य किंकरः कुम्भोदर:।
                                                        कैलासगौरं वृषमारुरुक्षो:
                                                         पादार्पणानुग्रहपूतपृष्ठम्।
                                                         अवेहि मां किङ्करमष्टमूर्ते:
                                                         कुम्भोदरं नाम निकुम्भतुल्यम्।।३५।।
पदच्छेद: – किङ्करमष्टमूर्ते: – किङ्करम् + अष्टमूर्ते:।
वृषमारुरुक्षो: – वृषम् + आरुरुक्षो:।
अन्वय:                       अन्वयार्थ:
कैलासगौरं वृषं             – कैलासपर्वतसदृशं शुभ्रं ऋषभं
आरुरुक्षो: अष्टमूर्ते:       – आरोढुम् अभिलषत: परमशिवस्य
पादार्पणानुग्रहपूतपृष्ठं      – पादन्यासेन पवित्रीभूतं पृष्ठभागं
कुम्भोदरं नाम                – कुम्भोदरनामकं
किङ्करं                         – सेवकं
निकुम्भमित्रं                  – निकुम्भस्य मित्रं
माम् अवेहि                   – माम् जानीहि।
सार: – अहं वृषभारूढस्य अष्टमूर्ते: शिवस्य सेवक: कुम्भोदर: भवामि।
विग्रह: – कैलासगौरम् – कैलास इव गौरम्।
अष्टमूर्ते: – अष्टौ मूर्तय: यस्य स:, तस्य।
क्रिया – अवेहि – अव् अ इण् गतौ पर-लोट्-म-पु-ए-व।
अवेहि – अवेतां – अवेत।

३६. शिवेन पुत्रीकृत: देवदारु: पुरत: अस्ति।
                                                   अमुं पुर: पश्यसि देवदारुं
                                                    पुत्रीकृतोऽसौ वृषभध्वजेन।
                                                    यो हेमकुम्भस्तननिस्सृतानां
                                                    स्कन्दस्य मातु: पयसां रसज्ञ:।।३६।।
पदच्छेद: – पुत्रीकृतोऽसौ – पुत्रीकृत: + असौ।
अन्वय:                         अन्वयार्थ:
पुर:                               – अग्रत:
अमुं देवदारुं                    – इमं देवदारुनामकं वृक्षं
पश्यसि                           – वीक्ष्यसे
य: असौ                          – य: अयं
वृषभध्वजेन                    – वृषभवाहनेन शिवेन
पुत्रीकृत:                        – पुत्रत्वेन स्वीकृत:
स्कन्दस्य मातु:               – कुमारस्य मातु:
हेमकुम्भस्तननि:सृतानां    – हेमकुम्भस्तनाभ्यां नि:सृतानां
पयसां                          – क्षीराणां, नीराणां।
रसज्ञ: (भवति)              – स्वादु ज्ञातवान् (भवति) (पुर: स्थितोऽयं देवदारु: शिवेन पुत्रीकृत:)
सार: – हे राजन्, त्वं अग्रतो एनं देवदारुवृक्षं पश्यसि खलु? अयं पार्वतीपरमेश्वराभ्यां पुत्रत्वेन स्वीकृत:। यथा
पार्वतीदेवी स्कन्दं वात्सल्येन स्तन्यं पाययति स्म, तथा जलसेचनेन एनं देवदारुं परिपालयति
हेमकुम्भसदृशाभ्यां स्तनाभ्यां स्कन्दं पयसा पाययति। हेमकुम्भमेव स्तनं, तेन देवदारुं जलेन प्रवर्धयति।
विग्रह: – रसज्ञ: – रसं जानातीति रसज्ञ:।
पुत्रीकृत: – अपुत्रं पुत्रं सम्पद्यमानं कृत:।
वृषभध्वजेन – वृषभ: ध्वज: यस्य स: वृषभध्वज:, तेन।
क्रिया – पश्यसि – दृशिर् प्रेक्षणे पर-लट्-म-पु-ए-व।
पश्यसि – पश्यथ: – पश्यथ।
३७. पार्वती एनं देवदारुं दृष्ट्वा शुशोच।
                                                    कण्डूयमानेन कटं कदाचि-
                                                     द्वन्यद्विपेनोन्मथिता त्वगस्य।
                                                     अथैनमद्रेस्तनया शुशोच
                                                     सेनान्यमालीढमिवासुरास्त्रै:।।३७।।
पदच्छेद: – अथैनमद्रेस्तनया – अथ + एनम् + अद्रे: + तनया।
त्वगस्य – त्वक् + अस्य।
वन्यद्विपेनोन्मथिता – वन्यद्विपेन अ उन्मथिता।
अन्वय:         अन्वयार्थ:
कदाचित्        – एकदा
कटं              – कपोलं
कण्डूयमानेन  – घर्षयता
वनद्विपेन         – वनगजेन
अस्य त्वक्      – अस्य देवदारुवृक्षस्य त्वक््
उन्मथिता        – उत्पाटिता
अथ              – तदनन्तरं
अद्रे: तनया    – पार्वती
असुरास्त्रै:      – दैत्यास्त्रै:
आलीढं         –  क्षतं
सेनान्यमिव    – सेनापतिं स्कन्दमिव
एनं                – व्रणीतं अमुं तरुं दृष्ट्वा
शुशोच           – शोचितवती।
सार: – एकदा केनचित् गजेन देवदारुवृक्षस्य त्वक् कपोलघर्षणेन उत्पाटिता। दैत्यास्त्रै: व्रणितस्य कुमारस्य
(सुब्रह्मण्यस्य) अवस्थायां यथा पार्वती तथा एनं देवदारुं प्रति शुशोच।
विग्रह: – द्विप: – द्वाभ्यां पिबतीति द्विप:।
क्रिया – शुशोच – शुच् शोके पर-लिट्-प्र-पु-ए-व।
शुशोच – शुशुचतु: – शुशुचु:।

३८. वनद्विपानां निवारणार्थं अत्राहं नियुक्तः।
                                                तदा प्रभृत्येव वनद्विपानां
                                                त्रासार्थमस्मिन्नहमद्रिकुक्षौ।
                                                 व्यापारित: शूलभृता विधाय
                                                 सिंहत्वमङ्कागतसत्ववृत्ति:।।३८।।
पदच्छेद: – प्रभृत्येव – प्रभृति + एव।
अस्मिन्नहम् – अस्मिन् + अहम्।
त्रासार्थमस्मिन्नहमद्रिकुक्षौ – त्रासार्थम् + अस्मिन् + अहम् +अद्रिकुक्षौ।
अन्वय:                  अन्वयार्थ:
तदा प्रभृति               – तत्कालात् आरभ्य एव
वनद्विपानां त्रासार्थं      – वनगजानां भयार्थं
शूलभृता                   – शिवेन
अङ्कागतसत्ववृत्ति:        – समीपमागतप्राणिभक्षणशील: एव
सिंहत्वं                        – केसरित्वं
विधाय                         – कृत्वा
अस्मिन् अद्रिकुक्षौ         – एतस्मिन् पर्वतगह्वरे
अहं व्यापारित:              – अहं नियुक्त:।
सार: – ‘सिंहरूपधारिणा समीपागतजन्तुभोजिना त्वया वनगजेभ्य: अयं वृक्ष: रक्षणीय:’इति मत्स्वामिन: शिवस्य
आज्ञा। तदारभ्य अस्यां गुहायां निवसामि। (इति सिंह: राजानमवदत्)
विग्रह: – शूलभृता – शूलं बिभर्ति इति शूलभृत्, तेन।
सत्ववृत्ति: – सत्वै: वृत्ति: यस्य स: सत्ववृत्ति:।
सिंहत्वम् – सिंहस्य भाव: सिंहत्वम्।

३९. इयं धेनु: क्षुधितस्य मम तृप्त्यै अलम्।
                                   तस्यालमेषा क्षुधितस्य तृप्त्यै
                                     प्रदिष्टकाला परमेश्वरेण।
                                     उपस्थिता शोणितपारणा मे
                                      सुरद्विषश्चाद्रमसी सुधेव।।३९।।
पदच्छेद: – सुधैव – सुधा + एव।
तस्यालम् – तस्य + अलम्।
सुरद्विषश्चान्द्रमसी – सुरद्विष: + चान्द्रमसी।
अन्वय:                अन्वयार्थ:
परमेश्वरेण            – शिवेन
प्रदिष्टकाला          – निर्दिष्टसमयं यावत्
उपस्थिता             – सम्प्राप्ता
एषा शोणितपारणा  – इयं रक्तपारणा (गोरूपा) (पारणा तु व्रतावसाने समाप्तिरूपकं पानीयस्य नाम)
सुरद्विप:              – देवारीणाम् (दैत्यानां)
चान्द्रमसी            – चन्द्रसम्बन्धिनी
सुधा इव             – अमृतमिव
मे तृप्त्यै               – मम तृप्त्यर्थं
अलम्                 – पर्याप्तमस्ति।
सार: – अत: परमेश्वरेण प्रदत्ता एषा धेनु: मम पारणासमये प्राप्ता एव। देववैरिणां चान्द्रमसी सुधा इव एषा मम
तृप्त्यै पर्याप्ता अस्ति।
अलङ्कार: – उपमा।
विग्रह: – चान्द्रमसी – चन्द्रमस: इयम्।
क्षुधितस्य – क्षुत् अस्य अस्तीति क्षुधित:, तस्य।
परमेश्वरेण – परम: ईश्वर: परमेश्वर:, तेन।

४॰. त्वं लज्जां विहाय गच्छ।
स त्वं निवर्तस्व विहाय लज्जां
गुरोर्भवान् दर्शितशिष्यभक्ति:।
शस्त्रेण रक्ष्यं यदशक्यरक्षं
न तद्यश: शस्त्रभृतां क्षिणोति।।४॰।।
पदच्छेद: – गुरोर्भवान् – गुरो: + भवान्।
यदशक्यरक्षम्– यत् + अशक्यरक्षम्।
अन्वय:                           अन्वयार्थ:
स: त्वं                           – तादृश: (शत्रुनाशने समर्थ:) भवान्
लज्जां विहाय                    – व्रीडां परित्यज्य
निवर्तस्व                          – प्रतिगच्छ
भवान्                             – त्वं
गुरो: दर्शितशिष्यभक्ति:      – गुरुं वसिष्ठं प्रति प्रकाशितभक्ति: अस्ति
यद् शस्त्रेण अशक्यरक्ष्यं      – यद् आयुधेन अपि रक्षितुमशक्यं
तद् रक्ष्यं                        – तद् संरक्षणीयं वस्तु नष्टं चेदपि
शस्त्रभृतां यश:                 – शस्त्रधारिणां कीर्तिं
न क्षिणोति                      – न हिनस्ति।
सार: – गुरुधनस्य रक्षणे तव श्रद्धा महती। अत: लज्जाम् उपेक्ष्य गच्छ। यद् आयुधेनापि रक्षितुम् अशक्यं वस्तु
नष्टं चेदपि तत् शस्त्रधारिणां कीर्तिं न हिनस्ति।
विग्रह: – रक्ष्यं – रक्षितुं योग्यम्।
शस्त्रभृतां – शस्त्रं विभर्ति इति शस्त्रभृत्, तेषाम्।
क्रिया – निवर्तस्व – नि अ वृतु वर्तने आत्म लोट्-म-पु-ए-व।
निवर्तस्व – निवर्तेथाम् – निवर्तध्वम्।

पुनरावृत्तिः (Recap)

वस्तुनिष्ठप्रश्नाः (Objective type questions)

एकेन वाक्येन द्वाभ्यां वा उत्तराणि लिखत।(Answer the following questions in one or two sentences)

निर्दिष्टाभ्यासः (Assignments)

उत्तराणि (Answer to Objective type questions)

अधिकवाचनाय ग्रन्थाः (suggested Readings)